•  Asawn 

A kgh I ubrid
Ad aligh asawn aligh tama
Zerigh afud
Akin gulugh a yafrux
Igrden s umalu
Akin gulugh
Urta kinn gulan
Urta kid rurin
S amazir n treggam

Addud s yid urta
K annin ingmaren urta
Addud ar ghuri
A nessigh afa nawey
Aman I imehda
D ayt ukarif
trart lbal s twira
d urezzum n igenwan

MALLAL 18/01/1989

  • Fad

Mad ra dak gegh a yulinew
Mad ra dak inigh
iydjigen qquren s fad
ur ufin matten issewan
ur ufin matten ihdan igellin
ur ufin
nekrimt a tinezdamin teghared lmut n usemmid
atfel iqqenagh imawen tizeghatin ar xellunt
nkrimet a tinagamin iqqur wasif s lehma
afa yumz ihentac imatagen ar ttaren
yasus muzun I wseklu yasus wadu I nnewar
therra tafuyt ayya rheln awd imula
nekrimt a timazighin itran n tifawt ulind
aweyimt tiguta s iseghar n tewririn
aweyimt timelsa d wuttcu d waman
I yemnayen i3ezzan yusin imenghan
Asyimt agari imezza iwinagh akal
Awink a yanu d ughbalu n wam

MALLAL 1988

  • Ilila

Addayy ttagh tafuyt ssidden iskwla
Ifsu imendi d wamud yaly s afella
Tawey trgwa ifrawen rzemn isfsa
Sun iydjigen aman asin timqqa
Siweln igdad irirn ammas n icthan
Ilila ilila
Ilila izedin d waman
Ikk wasif gr ilila imun d igherman
iwwet unzar timqqa sslsanet iskwla
tizzewa tiwey I ighwra aman d uydjig
targwa tusey aman igdad ar digh ssan
neck usigh taghufi new ddugh g iberdan
ilila ilila
ilila imann d wamanMALLAL 12/02/1992

  •  Itri

A yitri nna illan xf usney
Ad uri tezrit
Qqim gid asidd 3awnid imttawen
Ad uri tezrit
A yitri nna illan g ufella
A yitri bu wudem nna izddigen
Aman mllulen s usidd nnek
Urtan ula yigran
Tasa n yid dayi tsawalem
Mri issin a yitri
Akk asigh s afus inew
Mri issin a yitri
Ann iligh tamannek
Righ akk izirn ayt ma
Izirnek ayt igherm
A yitri da yallagh da yallagh
Tudert zzayn imulannes da yallagh
Mdden da ttaren izghwran da yallagh
Kkan ifexsan udmawen da yallagh
Ifassen ar zellan idudan da yallagh

MALLAL 22/02/1993

  • Tamegra

Uram gerigh g tmegra
Uram d3igh s tmara
Uram ghwrigh s tmghera
Uram bedigh s twada
Mad ur tellit
Yuf is naghul urta
Yulid wayyur
Yuzend asidd ifsan
Max agi tezhit awa
Max agi tezrit awa
Is tak ur zerin ayt umadl
Is tak ur ufin ayt usagwm
Is tak ur bdirn ayt usammer
Is tak ur udiren ayt ighrem
Ak ssendun tamegra
Ak ssendun tameghra

MALLAL 1989

  • Meqqar

Meqqar da tallat
Urk yad umingh
A yan I yiwin
S asawn izeryi
A yan issegman
Ggul tikerkas
A yan iyennan
Tayri ka illan
Yughul igd zari
Uccen aderghal
Mqqar di tiwit
Igr n iydjigen
Meqqar di tsmant
Itran n igenwan
Ig irza urku
Ur sar yad iman
Ig irza wamud
Zehu tamgera

MALLAL 27/11/07

  • Z rey zrey

Zrey zrey
Zrey zrey a tudert
May kem id ittfaren
Zrey zrey amm wussan
Nan uydjig ifsan
Ad ughuln waman tirggwin ur nnin
Ad ughuln wussan s tamzit ur nnin
A yayedd ulawen rezan bla awal
A yayedd irizen ddan urten nkwtiy
Mqqar d ilula kra asekka iddu
Zhunt wiyyad mqqar ten issegma
Zrey zrey
Tga tudert amm waman nna izerin
Ulind imezzann ur jun zerin imdwan
Tga tudert abrid I kan I wedrar
Izela wakal d uzeru izela wawal nnes
Ur yad iqqimi ighrem lligh n wakal
Ula nssen willigh izedan iyidar
Zrey zrey

MALLAL 16/08/1989